الشاعر المربي توفيق يوسف لبلدته سير الضنية
اللبنانية للأخبار ( رؤوس – أقلام ) بقلم المربي الشاعر توفيق يوسف – يهدي قريته سير لوحة من شعره الزجلي يصف فيها شيئ من جمالها
.شو بخبرك ؟
فقت الصبح ع نغمة عصافير
والنهر دافق لحن ع صوت شلالو
وراعي عم يلاعب قصب مبسوط فوق الشير
وشاعر ع موج الهوا بيموج موالو
ونسمات بين الورق عم تعمل مشاوير
وتبوس خد الهني النايم بعرزالو
وصفصافة اللي بتستحي حنت على الجرجير
والدلب صوب الشمس عم يوسع مجالو
والسنديان العصي المزروع عنا كتير
ناوي يضاهي الارز ع زهوة تلالو
ملبّك بحالو الحقل غرقان بالتفكير
احلى قصيدة غوى عم ينظم جلالو
والاربعين انحنى للحب والتقدير
تيبوس ايد الوفي اللي عالية جبالو
ودمع (القسام ) النبع عندو الف تفسير
كلون بيصبّوا صفا ع خدود زجّالو
والانبيا تجمّعوا فوق الجبل بكّير
بخشوع ركعوا سوا يصلّوا على ديالو
استدركت قلت : الوحي نازل علينا ب سير
وشكرت رب البشر ع صدق مرسالو
وعرفت انّو انا ما غلطت بالتّقدير
وعرفت ما في فرق بين اللي شفتو وبين
الشاعر عماشة النقي ال جينا على بالو

Copyright © 2019 LEBANESE NEWS - اللبنانية للاخبار. All Rights Reserved. Designed by AmcTag